Ka ṭhian duhtak

Kan upa telh telh a, ṭhiante pawh han in hmuhkhawm chu sawiloh, inbiak pawh ringawt pawh a harsa telh telh tawh a. Engemaw changa chanchin han inzawh zeuh pawh thil buaithlak a ni chho ṭan a. Piancham in lawmpui hun hi kan inbiak tam ber a ni ve ta reng mai. Duhthlan theih nise, hlim taka ṭhianho a han nuih uar uar a, lungkham vak neilo a awm reng kha kan thlang ṭheuhvin ka ring. Mahse, mihring chu hmasawnna nena ke pen tura duan kan ni a. Kan awmhmun ngaia kan awm reng chuan hnungtawlh kan ni mai dawn si. Khawvel inher zelin a a ken tel, hmasawnna chu kan duh emaw duhlo emaw kan vawn ve tlat a ngai si. Ngai tak chung siin kan nun hlui te kan thlahliam a, kan thinlung a cham reng turin kan ṭhenrual ṭha te pawh kan vai liam ve mai a. 

Tuemaw chuan, “mamawh lai chauha min be tu chu ṭhianṭha an nilo”, tiin alo sawi thla ve rawk a. Kei erawh chuan heihi ka chah duh che ka ṭhian, I hlim ni in mi hrechhuak lo mah la, I lungngaih ni emaw min mamawhna I nei anih phawt chuan I tan ka awm reng tih hi hria la ka duh. Mimal buaina in min chim lai pawha, min la mamawh ve a ni tih ka hriatna khan kan inkungkaihna a ngheh zia min hriatnawn tir a. I lungngaih ni a, I dâr ni tura min hrechhuak ringawt pawh kha ka tan chuan a hlu lutuk ania. Kan hringnun zinkawngah hian kal dun reng thei kan nilo a, mahni kawng kawnga kan pen darh hun alo thlen hian, ui tak chung si a inkalsan alo ṭul hian ṭhian hlutzia ka hrechhuak nawn leh ṭhin. I kal zelna turah duhsakna ka hlan che a. Hlawhtlinna no dawm dun ngei turin I han bei leh fat fat ang aw. 

Kan inhmuh kan intawh leh hma zawng.

-I ṭhian, 

Hminghlui Hc